Euskarazko liburutegi digitala aurkeztu du UEUk

Udako Euskal Unibertsitateak (UEU) Buruxkak liburutegi digitala aurkeztu zuen atzo, osteguna. Egitasmo berriaren helburua unibertsitate mailako materiala erabiltzaileen esku PDF formatuan jartzea da, batez ere unibertsitario euskaldunen eskura, ikertu, ikasi zein kontsultatzeko. Doako zerbitzu hau www.buruxkak.org helbidean topatu daiteke.

Buruxkak liburutegi digitala aurkezteko prentsaurrekoa eskaini zuten Bilbon Lore Erriondo UEUko zuzendariak eta Xabier Isasi UEUko Argitalpen arduradunak.

Erriondoren esanetan, "34 urteko ibilbidean, Udako Euskal Unibertsitateak 360 liburu unibertsitario ekoitzi ditu", EHUrekin batera, esparru honetan ekarpen handiena egiten duen erakundea izanda.

Hala ere, beste hizkuntzekin alderatuta, oraindik unibertsitate mailako euskarazko dokumentazio bolumena "oso urria" dela nabarmendu zuen, eta euskal adarreko ikasleak esku-liburuekin ikastera ez daudela ohituta gaineratu, "apunteak baitira beraien ikasketen ardatz".

"Hezkuntzaren alorrean dihardugunok badakigu zein garrantzitsuak diren ikas-materialak. Ikusi besterik ez dago lehen eta bigarren hezkuntzan egun erabiltzen diren testu-liburuak zein landuta dauden. Baina ez soilik itxura eta maketazio alorretik, baizik eta aurrez ongi diseinatutako hezkuntza planaren kate begiak direlako", azaldu zuen.