Zazpi orduko kaosa A-8an kamioi bat irauli eta gero

argazkia handitu

Artaziarena egin duen kamioia. Argazkia: EiTB

18:50ak aldera A-8ko errei bat ireki dute Donostiarako noranzkoan, Zaldibar parean, behin goizean artaziarena egindako kamioia errepidetik kenduta.

Kamioi batek artaziarena egin du gaur goizean A-8 autobidean eta, ondorioz, autobidea guztiz itxita egon da norabide horretan.

Kamioiak enborrak zeramatzan eta bidean geratu dira barreiatuta. Bertaratu diren garabiak enborrak errepidetik kentzeko lanean aritu dira.

Kamioilaria ibilgailuaren barruan geratu da harrapatuta eta suhiltzaileek erreskatatu behar izan dute. Gerora, ospitalera eraman dute anbulantziaz zauriez artatzeko.

Ezbeharra 11:30ean jazo da Gipuzkoako hiriburuko noranzkoan eta, ondorioz, autobidea itxi behar izan dute. Ibilgailuak N-634 errepidetik bideratu dituzte (Durango parean), baina auto-ilarak eratu dira. Horrez gain, zirkulazioa arintzeko by-pass bat egin dute Bilborako noranzkoko bideetako bat Donostiarantz doazen ibilgailuek erabil dezaten.