2008/03/04
Negua itzuli da, indartsu, gainera. Azken asteetako udaberriko giroaren ondotik, fronte hotz bat sartu da eta euria, ekaitzak eta txingorra ekarri ditu. Horrez gain, elur-kota 300-400 metrotan kokatuko da gaur, Euskalmet Euskal Meteorologia Agentziaren arabera.
Gaur goizean elurra iritsi da eta ondorioz, zenbait mendatetan kateak behar izan dituzte ibilgailuek zirkulatzeko. Besteak beste, Urkiolan (Bizkaia), Opakua eta Orduñan (Araba) eta Lizarraga eta Belaguan (Nafarroa) behar izan dira kateak. Horrez gain, zirkulazioa asko zaildu du.
Arratsalderako, gainera, giro beltzagoa iragarri dute eta udal askok honi aurre egiteko baliabideak prest dituzte. Oraingoz, elurra egin ohi duen lekuetan bota du. Errepideak izango dira, hala ere, puntu korapilotsuenak eta elurra kentzeko makinak prest daude behar izanez gero errepidera irteteko.
Orreagan izan dira elurra ikusten lehenetarikoak. Goizeko lehen orduan hasi du elurra egiten.
Nafarroako beste toki batzuetan ere hala gertatu da eta mendateez gain, herrietan ere ikusi dituzte elur malutak, Lekunberrin, adibidez.
Iragarpena, egunez egun
Gaur neguko eguraldia izango dugu. Lurralde osoan zaparradak botako ditu eta elurra ere egin du; egunaren hasieran 800 metrotik gora espero zen, baina, goizetik aurrera, 300 metrotan. Tarteka, gainera, 200 metrotan ere kokatuko da.
Zaparradekin batera, ekaitza eta txingorra izan dira toki askotan. Ipar-mendebaldeko haize zakarrak eta Ebro bailarako ziertzoak giro ezatsegina eta hotza sortuko dute. Tenperaturek behera egingo dute nabarmen, toki askotan, zero gradukoak izango dira.
Asteazkenean eguraldiak hobetzera egingo du, zaparradei dagokienez behintzat. Euria egiten jarraituko du baina urria eta noizbehinkakoa izango da orokorrean. Giroa hotz egongo da, hala ere, eta elur-kota 400-500 metrotan aurkituko dugu hasieran, 600 metrora egunaren amaieran. Haizeak iparraldetik joko du baina asteartekoa baino ahulagoa izango da. Zerua hodeitsu egongo da.
Astea eguzkiarekin eta tenperaturen igoerarekin amaituko dugu.
Aupatu
Zabaldu