2008/05/12
Boris Tadic Serbiako presidente eta Alderdi Demokratikoko liderrak Gobernu berria eratuko duela iragarri du bart. "EBean sartzen eta Kosovo Serbian mantentzen" ahaleginduko dela azpimarratu du Tadicek.
Bestalde, Tomislav Nikolicen Serbiako alderdi Erradikalak (SRS) ere herrialdea gobernatzen saiatuko dela ohartarazi du. Horretarako Vojislav Kostunica lehen ministro ohiaren Serbiako Alderdi Demokratikoarekin bilduko dela jakinarazi du.
Dagoeneko botoen %33,9 zenbatu dituzte eta emaitzek Boris Tadic buru duen koalizioari (DS) ematen diote garaipena, botoen %36,9 eskuratuta Parlamentuan 102 ordezkari lortuko dituelako. Alderdi Erradikalak bozen %28,5 lortu ditu, Errepublikako Hauteskunde Batzordearen (RIK) arabera.
EB eta Kosovo dira "Gobernu berriaren eta presidentearen helburu nagusiak", nabarmendu du Tadicek alderdiaren egoitzan.
Europan sartzeko nahia argi utzi dute serbiarrek, agintariaren arabera. "Presidentetzarako hauteskundeetan egin bezala, EBean sartu nahi" direla esan dute herritarrek azpimarratu du.
Nikolicek ere gobernatu nahi du
Bestalde, Gobernua eratzeko elkarrizketak hasiko dituela iragarri du Tomislav Nicolic SRSko presidenteorde eta hautagaiak. Horretarako, lehen bilera Kostunicaren DSSrekin izango duela baieztatu du.
Gobernu berria osatzeko babes nahikoa izango dutela esan du Nikolicek, nahiz eta oraindik alderdiekin kontakturik ez izan.
Euskadi Irratiko azken albistegia
webgunearen portadan, erabiltzaileek emandako botoei esker:
Aupatu
Zabaldu
