Herritarrak eta politikariak elkarrekin mintzatuko dira gaur Bilbon

Herritarrek eta politikariek elkarrekin eta aurrez aurre hitz egiteko aukera izango dute gaur arratsaldean Bilbon, Konpondu ekimenaren baitan.

Hain zuzen ere, egungo egoera politikoa eta normalizazioa lortzeko balizko konponbideak hartuko dituzte hizpide. 19:00etan izango da hitzordua, Arte Eder Museoan.

Eusko Legebiltzarreko alderdi guztiek hartuko dute parte, PSEk eta PPk izan ezik. Juan Jose Ibarretxe lehendakaria ere izango da bertan.

Ekimenean parte hartuko duten herritarrak (udal foroetan parte hartu duten pertsonak) taldeka banatuko dituzte, eta politikariekin zuzenean hitz egingo dute. Ondoren, esandakoa txosten batean bilduko dute, eta Columbiako Unibertsitateak ondorioak aterako ditu.

Ibarretxek iazko urtarrilean abiatu zuen Konpondu ekimena, eta harrezkero 105 udalek bat egin dute eta orotara 1.500 pertsona bildu dituzten ehunka ekitaldi egin dituzte.