2008/04/29
Jose Luis Rodriguez Zapatero Espainiako Gobernuko presidenteak atzo jakitera eman zuenez, Juan Jose Ibarretxe lehendakariarekin biltzen denean, uda baino lehen, argi utziko dio beste behin ere ez duela "abenturarik" onartuko, lehendakariak erabakitzeko eskubidearen inguruan herri galdeketa egiteko azaldutako asmoari buruz hitz eginez.
"Inork ez ditu jokoaren arauak hautsiko euskal gizartean gero eta babes gutxiago dauzkan proiektu batekin", esan zuen atzo Zapaterok TVE telebista kateko '59 segundos' saioan.
Ildo berari jarraituta, EAEn hauteskundeak aurreratuko dituztela uste duen galdetuta, Espainiako Gobernuburuak azaldu zuen hori ez dagoela bere esku. "Nire esku dago galdeketa hori, edo legearen aurkakoa den beste edozein, egingo ez dela bermatzea". "Jarrera hau lehendakariari helaraziko diot" azpimarratu zuen eta "Euskadiren eta Espainiaren onerako" elkar ulertzea espero duela gaineratu.
Azkenik, terrorismoaren aurkako borrokari dagokionez, Zapaterok PPrekin eta EAJrekin akordio batera iristeko aukerak daudela uste du.
Ez du, ordea, ETArekin elkarrizketak berriz abiatzeko aukerarik aurreikusten. Zapaterok tinko baztertu du: "Ez dugu Etrekin hitz egingo. ETAren etorkizun bakarra armak uztea da".
Euskadi Irratiko azken albistegia
webgunearen portadan, erabiltzaileek emandako botoei esker:
Aupatu
Zabaldu
