Arriola eta Joakin, Nazioarteko Irekiaren hasieran

Arriola eta Joakin profesionalak Durangoko Ezkurdi frontoian 18:30etan hasiko den Master Jai zesta punta Irekiaren lehenbiziko jardunaldiaren protagonistetako bi izango dira.

Jonek lehenengo kanporaketan hartuko du parte eta, Joxemirekin batera, Txelis-Asiainen kontra neurtuko da. Azken bi hauek goi-mailako pilotariak dira eta ia berrogeita hamar kirolari hartuko duen torneo honetan bere kalitatea erakusten saiatuko dira.

Jarraian, arratsaldeko bigarren lehian, Joakinen txanda helduko da. Hau sasoian dago, baina Donibane Lohizuneko finalera ailegatu denez, 48 ordutan hiru partida jokatu beharko ditu eta berarentzat hori desabantaila izan daiteke. Norgehiagoka erakargarri honetan, markinarrak, iragan hilabetean kantxa honetan bertan Durangoko Irekia irabazi zuenak, Aizpurua izango du lagun eta bere aurkariak Iturrino eta Onaindia izango dira.

Alberdi II eta Barrondo zain daude

Alberdi II.ak eta Barrondok kanporaketa hauek arreta handiz jarraituko dituzte, handik aterako baitira bigarren faseko aurkariak. Joxemi-Arriola eta Txelis-Asiainen arteko neurketaren garaileak Alberdi II eta Urbietaren kontra ariko dira, eta Iturrino-Onaindiak edo Aizpurua-Joakinek, berriz, Alberro-Barrondoren aurka jokatuko dute maiatzaren 9, 10 eta 11n ospatuko den bigarren fase honetan.