Bushen arrakasta Iraken

argazkia handitu

Jesus Torquemada, nazioarteko gaietan aditua. Argazkia: EiTB

Iraken dena doa ondo, hala diote Bushek eta haren aholkulariek. Esan ez ezik, sinistu ere egiten dutela dirudi. Hildako 4.000 soldadu estatubatuarrei buruz galdetzen zaienean, hildakoen hazkunde tasa aurreko urteetan baino gutxiago hazi dela argudiatzen dute. Egunero jazotzen den atentatuaz galdetzean, lehen gehiago zeudela eta, beraz, bidalitako errefortzuak eraginkorrak izan direla erantzuten dute. Irakiarrek eguneroko bizitzan dituzten zailtasunei buruz itaunduta, Saddam Husseinekin baino demokrazia gehiago dagoela erantzuten dute (sinistuta daude atzerriko 160.000 soldaduren zaintzapean demokrazia egon daitekeela). Gaur bertan Basora astintzen ari diren liskarrak aipatuta, herrialdea orain urte batzuk baino egonkorrago dagoela nabarmentzen dute. Suntsipen handiko armarik ez dagoela esaten dietenean, Saddam mundu guztiarentzat mehatxua zela adierazten dute. Nazioarteko terrorismoaren gorakadaren aurrean, Iraken terrorismoaren aurkako gerra irabazten ari direla errepikatzen dute. Petrolioaren prezioa etengabe hazten ari dela eta, Irakeko inbasioak energia segurtasuna bermatzeko balio izan zuela adierazten dute.

Hil diren ehunka milaka irakiarrei buruz galdetzen dietenean, ez dute ezertxo ere esaten. Ez dirudi arduratzen direnik, ikerketa batzuek milioi bat hildako egon direla dioten arren eta txosten zuhurrenak 100.000ko zifra ematen duten arren. Eskerrak Irakeko inbasioa arrakastatsua izan den, porrota izan balitz...