2008/02/05
Ordenagailua jolaserako erabiltzen dute, batez ere, gaur egun, neska-mutikoek. Luze gabe, ordea, ikastolako lan-tresna didaktiko arrunta bihurtuko zaie.
Izan ere, Ikastolen Elkarteak proiektu berritzaile eta aitzindaria sortu du: liburu baten tamaina duen ordenadore eramangarria izango du, batetik, ikasle bakoitzak eta aplikazio informatiko berezi baten bidez nahi horretarako propio sortu diren milaka ariketen bidez ikasle bakoitzaren lan erritmoaren jarraipena egin ahal izango dute irakasleek.
IKASYS izena darama Ikastolen Elkarteak sortu duen ordenadore bidezko ikaste-sistema berritzaileak. Arantza Manterola Gipuzkoako Ikastolen Federazioko buruak azaldu duenez, "ikastolek esperientzia dute teknologia eta pedagogia uztartzen".
Oihan Odriozola sistemaren arduradunak azaldu du ikasle bakoitzak ordenadore txiki bat izango duela gelan, bere lanak egiteko.
Ordenagailua tresna modura hartuz eta aplikazio edo softwararen bidez, ikaste-sistema pertsonalizatu bat emango zaio ikasleari, eta neska-mutiko bakoitzak bere mailara eta erritmora egokituko ditu ikastolako ariketak. Irakaslearen gidaritzapean, beti ere.
Bost eremu jorratzen dituzten 200.000 ariketa sortu dituztela adierazi du Josune Gereka proiektuaren zuzendari teknikoak. Ariketa horiek edukiak memorizatzen eta gaitasunak lantzen lagunduko diete ikasleei.
Apirilean jarriko da martxan proiektuaren lehen fasea
IKASYS proiektuaren lehen fasea apirilean jarriko dute martxan, hiru ikastolatan, 225 ikaslerekin.
Hurrengo ikasturtean beste 16 ikastoletara hedatuko dute sistema, bigarren fasea abian jarriz, eta ikasturte amaieran ebaluazio bati ekingo diote zer jarraipen izan dezakeen ikusteko.
Bi miloi eurotik gorako aurrekontua du proiektuak. Lehen bultzada Gipuzkoako Foru Aldundiak eman zion eta diru kopururik handiena Madrilgo Hezkuntza Ministerioak jarri du, Kongresuko talde jeltzalearen eskariei erantzunez.
Euskadi Irratiko azken albistegia
webgunearen portadan, erabiltzaileek emandako botoei esker:
Aupatu
Zabaldu
