Fiskaltzak Hernaniko alkatearen kontrako salaketa jarri du

argazkia handitu

Marian Beitialarrangoitia, ANVk Iruñan egindako ekitaldian. Argazkia: EFE

Multimedia

• Marian Beitialarrangoitiak ANVk Iruñan egindako ekitaldian esandakoa

Erlazionatutako albisteak

• ANV: "Ilegalizazioaren gainetik, hauteskundeetan egongo gara"

Audientzia Nazionaleko Fiskaltzak Marian Beitialarrangoitia (ANV) Hernaniko alkatearen kontra salaketa jarri du, ustez, terrorismoa goratu zuelako atzo Iruñeko ekitaldian Igor Portu eta Mattin Sarasola ETAko ustezko kideen alde txaloak eskatu zituenean.

Iturri fiskalek jakinarazi dutenez, Santiago Pedraz aste honetan guardian dagoen epaileari alkatea deklaratzera deitzeko eskatu dio Fiskaltzak. Izan ere, terrorismoa goratzeko delitua egin izana leporatzen diote alkate abertzaleari. Bi urte arteko kartzela-zigorra ekar dezakeen delitua da hori.

Poliziak emandako informazioa aztertu eta gero, Javier Zaragoza Audientzia Nazionaleko fiskal buruak Ignacio Gordillo guardiako fiskalari salaketa gaur arratsaldean bertan jartzeko agindu dio. Gainera, poliziaren txosten zabalagoak eskatzeko ere agindu dio, ekitaldian parte hartu duen beste edonork ere deliturik egin duen ala ez jakiteko.

Bestalde, Poliziak Fiskaltzari emandako informazioan azaltzen denez, alkatearen hitzez gain, txaloak eta oihuak egin zituzten ikusleek Arrasaten atxilotu zituzten Igor Portu eta Mattin Sarasola ETAko ustezko kideen alde.