2007/11/30
EAJ
Iñigo Urkullu EAJren BBBko presidenteak agiri baten bidez adierazi duenez, "makroprozesu hau, iraganeko gertakari bat da, PPren Gobernuaren babespean hasi zena". Auzi honetan demokrazia bati dagozkion jarraibide judizialik izan ez dela nabarmendu du.
Eusko Alkartasuna
Onintza Lasa EAren Komunikazio arduradunak uste du "inpultso politiko baten ondorioz egindako polizia-operazio" baten aurrean aurkitzen garela. "Demokrazian dena ez da zilegi; guztia ETA denaren argudioa ezin da erabili", erantsi du.
Ezker Batua
Oskar Matuteren iritzian, atxiloketak hauek "tentsioa eta sumina areagotzea dute helburu, izan ere, auzipetuek ihes egingo dutenaren arriskurik ez dago". 18/98 prozesua "zirku mediatiko eta politikotzat" jo du.
Aralar
Aralarrek salatu du "prozesu guztia aberrazio juridiko bat" izan dela. Elkartasuna adierazi die atxilotuei eta horiek ordezkatzen dituzten erakundeei, eta atxiloketak epaia ezagutu aurretik egin izana salatu du.
PP
Carmelo Barrio EAEko PPren idazkari nagusia, aldiz, pozik agertu da gertatutakoarekin, eta polizien jarduna txalotu du, operazioa “ETA garaitzeko” egin delakoan. "Gaur gertatu dena normala da Zuzenbide Estatu batean", esan du.
ANV
ANVk nabarmendu du atxiloketek "argi" erakusten dutela euskal herritarrek "inoiz" baino arrazoi gehiago dituztela independentziaren alde egiteko. Alderdi abertzaleak Espainiako Gobernua kritikatu du, euskal gizartearentzat duen eskaintza bakarra “Konstituzioa eta errepresioa” direlako.
NaBai
Maiorga Ramirez NaBaiko bozeramaileak atxiloketak salatu ditu eta operazioa gauzatzeko hautatutako unea ere kritikatu du, hauteskunde kanpainaurrea delako. Gainera, kexa agertu du, atxilotutakoetako batzuek konpromisoa agertu dutelako askatasunen eta giza eskubideen defentsan.
Batasuna
Batasunak "oso larritzat" jo ditu atxiloketak, eta PSOEri eta EAJri egotzi dizkie. Bi alderdi horiek gaur egungo Konstituzioa iraunarazi nahi dutela eta EAEko Estatutua eta Nafarroako Foru Hobekuntza erreformatuz independentziari "ateak itxi" nahi dizkiotela esan du.
Askatasuna
Askatasunak azpimarratu du atxiloketa hauen bitartez "oinarrizko eskubide demokratikoak" ukatu dituztela, "edozein demokraziatan eskandalu politiko izugarria suposatuko lukeen eskubideen ukazioa hain zuzen ere". "Inoiz baino gehiago herri bezala kalera ateratzeko garaia da", agertu du.
ELA
ELA sindikatuak iritzi dio Auzitegi Nazionalaren agindua "astakeria" izan dela, eta erabakiak "Ordena Publikoaren Auzitegi frankista" gogoratzen diola. Ohar batean, sindikatuak azpimarratu du prozesuak ez duela oinarri juridikorik eta erabaki politiko baten ondorio dela.
LAB
LAB sindikatuaren ustez, operazioa "beste eraso" bat izan da, "ez bakarrik zuzenbide zibil eta politikoen aurka, baizik eta Herri honek aldaketa politiko eta soziala egiteko dituen gogoen kontra ere". Ohar batean, LABek "PSOEren Gobernuak elikatzen duen estrategia juridiko eta politiko" honen aurka protesta egiteko deia egin die langileei.
Euskadi Irratiko azken albistegia
webgunearen portadan, erabiltzaileek emandako botoei esker:
Aupatu
Zabaldu
