Eibarrek German Beltran fitxatu du

Barakaldon egin duen laugarren denboraldia eraginkorrena izan da golari dagokionean, bigarren multzoko hirugarren golegile nagusi izatera heldu baita Ponferradinako Oscar de Paularen (16 gol) eta Huescako Roberto Garciaren (20) atzetik. Hala ere, ez da aurrelari petoa, gehienetan hegalean edota aurrelarien atzetik jokatzen baitu.

Beltranek 28 urte ditu eta Teruelen dagoen Alcañiz herrikoa da. Real Madrilen harrobian hasi zen, eta gero Reus, Teruel eta 2004az geroztik Barakaldo taldeetan jokatu du.

Aurrealdean jokatu ohi duten Jose Maria Cases eta Carlos Ruben Esteban jokalarien fitxaketei gehitu zaie Beltranena. Hiru fitxaketek Joseba del Olmoren, Nico Medinaren eta Jon Altunaren bajak ordezkatzeko balio izango dute.

Eibarrek dagoeneko bost fitxaketa egin ditu, talde gipuzkoarretik alde egin duten hamairu jokalariak ordezkatu behar izango dituztenak eta momentuz, 16 jokalarik osatutako taldea dauka.